صور بطايق البدون ( المقيمين بصوره غير قانونية على قولة الحكومة )

للأسف صار لنا نحن الكويتيون بلا هويه المظلومون المغلوبون على أمرنا الذين ليس لنا غير الله هو أعلم بحالنا وهو المنتقم لنا من كل من ظلمنا وشردنا وأهاننا طوال هذه السنوات أمام الجميع .

مره يسمونه بدون ومره غير محددي الجنسيه ومره فئة البدون ( جنه جلاب سلق شنو هذي بعد كلمة فئه اللي طالعين لنا فيها ) ومره يسمونا الغير كويتيين وللأسف لما قامو يطلعون لنا رخص قيادة سياره أطلقوا علينا اسم يديد شغل عدل فله اسمه المقيمين بصوره غير قانونيه
وأمانه شوفوا البطايق اللي يعطونا إياها ونتعامل فيها مع الشرطه والمستشفيات وكل مكان فيه معامله حكوميه أو بنكيه أو غيره ؟

والله شي يبجي بطاقه تفشل والله مالت دوله متخلفه مال قبل الميلاد شكل مبهذل لا والبطاقه مرات ما يقصونها عدل يعني عوجاء بالفصحى عويه !!!!!!

عيب عليج يا حكومه اللي تسوينه فينا هذا منظر بطاقه

وشوفوا شنو مكتوب عليها من ورا

وشوفوا بعد مدة البطاقه الأمنيه 6 شهور يعني ما يمديك تطلععها إلا تروح ثاني مره تجدديها حسبي الله ونعم الوكيل


والحين شوفوا الصدمه شوفوا شكل ومنظر رخصة القياده اللي يعطونه إياه وبذمتكم قولوا شرايكم فيه والي مكتوب فيه وشولن صاير منظره اللي يلوع الجبد


شوفوا شلون حطوا المسمى اليديد لنا مقيم بصوره غير قانونيه الوحيده مكتوبه طباعه والباجي كتابه باليد بالله عليكم اكو بطاقه حق ليسن ينكتب فيها بالايد بالعالم ألحين آه آه

وشوفوا شنو مكتوب من ورا

اقروا الملاحظه

عيل شلون نتعامل بهالبطايق يعني شغلنا على البركه ؟؟؟؟؟؟؟؟؟؟؟؟؟؟؟؟؟؟

اسم الجلسة جلسة البدون وممنوع على البدون يحضرونها ؟؟؟؟

هذا السؤال اللي سألته حق رجل المرور ( الشرطه )
بيوم جلسة البدون اليوم اللي قبله ما ياني النوم قلت أنا مقصر بأهم قضية بحياتي تخيلوا واحد ينهان كل يوم ومبيوق حقه صارله سنين أكيد بيحس على نفسه شوي ويقول أنا مقصر .

فقلت لازم أحضر هالجلسه يمكن تكون مفتاح الفرج وشوي نتفس بعد هالسنين اللي ضاعت من عمرنا واحنا ناطرين تتعدل أوضاعنا إحنا الجيل اللي من أول ما انولد وحال البلد من سيء لأسوأ من غزو صدام على الكويت ليه التضييق أكثر على البدون لين صار الحين الناس تعايرنا وتقول بدون حتى ماله مستقبل يعني مدفون بالحيا !

المهم فعلا اتصلت على رفيجي وقلت بحضر جلسة البدون وتفاجئت لقيت شارع الخليج كله مسكر واللي بيدشه يفتشونه ؟



قلت وليه شكله رفيجي قبسه (:



المهم نبي ندش مثل السيارات اللي خلتهم الدوريه يدشون شارع الخليج قالي الشرطي بطاقتك قلت بقلبي العاده يبون الاجازه والدفتر مو بطاقتي طبعا بكل حزن عطيته بطاقة البدون الخضرا قالي اصفط على اليمين صفطت شوي ولا صفط الشرطي واحد ثاني
وانتبهت انه الشرطي يخلي البطايق بإيده يعني الرايح والياي يشوف انه ترا هذيل اللي مصفطينهم كلهم بدون يعني احنا غير عن الناس .



المهم كثروا البدون اللي وقفهم الشرطي وبيننا بنات نزل واحد قال للشرطي تكفى عطني بطاقتي تأخرت على الدوام قاله الشرطي بغضب واحتقار تركب سيارتك ولا اركبك الدوريه ( عاشوا حماة الوطن عاشوا رجال الداخليه تتشطر على بدون فقير مسكين ) ربي يشوف ويحكم بيننا انشالله !



ولما يه الشرطي عندي يبي يعطيني بطاقتي الأمنيه قال وين رايح قلت بشوف الجلسه قال ممنوع قلت له ياخي الجلسه اسمها جلسة البدون وهم بعد ما ادخل اشوف شراح يصير لنا قال عندنا أوامر ولا واحد من البدون يدخل وإاذا تروح جدام وتكلمهم يدخلونك يركبونك الدوريه .



وبالنهايه ما دخلت ولا شفت الجلسه تدرون شصار بالجلسه ما اكتمل النصاب مال عدد الاعضاء اللي يحضرون الجلسه والحكومه بعد ما حضرت وفي نواب ناطرين برا عشان يتأكدون انه تفشل الجلسه الله يفشلهم دنيا وآخره يا رب .



عاشت الحكومه ووزارة الداخليه والأعضاء !!!!!!!!!!!!!

من الأولى جلسة البدون أم جلسة القروض في مجلس الأمة

السؤال سألته لنفسي لما لقيت إنه كل شوي مأجلين جلستنا وصرنا مصخره كل يوم ننطر وبالأخير على قولة أخواننا المصريين على فشوش


وكأنك يابو زيد ما غزيت أمر مؤسف ومؤلم إنك تواعد شخص على شي يهمك وبالنهايه ما ايي الموعد اكيد بيكون غضبك وتعاستك بمقدار أهمية هذا الأمر اللي كنت تنتظره !



بس شنسوي الظاهر صرنا آخر شي يفكرون فيه الناس بالكويت
( تدرون لا ورانا أصوات عشان نصوت فيها لأعضاء مجلس الأمه بالإنتخابات ( لكن بالعكس اللي ضد تجنيسنا من العنصريين واللي عيونهم ضيجه ويحسدون الناس على اللقمه يصوتون ويوجهون النواب ضدنا ربي يحاسبهم أشد حساب ) يعني بعد ما تنحل كل القضايا بالديره يالله يلتفتون لقضيتنا اللي صارلها عقود من الزمن و بيصير لنا قرن كامل وللحين ما حلوا قضيتنا يخوفي تنحل مع قضية فلسطين ولا بظهور المهدي المنتظر !؟




يعني أمانه منو الأولى واحد ما يشتغل ولا يتعالج ولا يتزوج ولا يطلع له شهادة وفاة وميلاد ولا واحد مديون !!!!!!!!!!!!!!!!!



أكيد الاثنين مهمين بس حسافه انه حياة إمية ألف وأكثر كل يوم يعانون ويصيرون آخر شي ........

الله كريم

أسئلة !

بسم الله الرحمن الرحيم



سؤال : في الأسبوع الأول يتم تبديل الرادياتور

في الأسبوع الثاني يتم تبديل رأس المكينة

في الأسبوع الثالث يتم تجفيت الجير

ألا يجب أن أخاف من القادم أم لم يبقى فيها شئ قادم أخاف منه؟



سؤال : في المقام الأول تمنعني من التعليم العالي على الرغم من وجود الأسباب

في المقام الثاني تعيق كل محاولة لي للحصول على وظيفة كريمة أعيل في نفسي وأسرتي

في المقام الثالث تريد أن تنزع حب هذه الأرض من قلبي (هيهات) !

ألا يجب أن يعيش المرء معيشة كريمة كأقرانه؟



سؤال : في الأساس الأول تكون النفس

في الأساس الثاني تكون قضيتي .. قضية غير محددي الجنسية

في الأساس الثالث تكون الأمة الإسلامية

على ماذا يجب أن تستند عليه أرائي الإجتماعية والسياسية وغيرها؟



تساؤلات في بالي الأول وقتي وعلى الأرجح لن أهتم به بعد فترة قصيرة والثاني يأتيني كما تأتي المنامات السعيدة إلي أحياناً في كل ليلة أحياناً أخرى أقضي شهوراً بعيداً عنها .. أما الثالث فهو السؤال الأهم والذي لم أجد إجابته وأنا أطرحه على نفسي في كل مناسبة !



كفى !